Barkadahang Diborsyo

"Lhayz"-The singer

Ginamit ang mga titik upang lumikha ng obra,

Alinsabay ng ritmong may baligtad na nota;

Di ko nalamang iba ang orihinal na piyesa,

Naniwala naman agad,sa bulaan mong kanta.

"Doubty"-The writer

Bumubukal sa  imahinasyong di matawaran ang bangis,

Mga lintanya't diyalogo'y nagagawa mo ng mabilis;

Matitinag ang mga manunulat,pati na si Helen Meriz,

Sa libro ng iyong haka-hakang sadyang walang kaparis.

"Spo4-Seloses"-The police

Pulis matulis ang bansag nila sa iyo,

Sa imbestigasyon,taob mo nga pati "SOCO",

"Surveillance cam" at posas ang laman ng kwarto ko,

Di ba't ako'y kasintahan at hindi naman preso?

"Captain Vanity"-The pilot

Sasakyan mong ang paradahan ay sa NAIA,

Manibelang hawak nga'y sa langit lagi ang punta,

Byaheng mong matayog,parang "pride " lang kumbaga,

Kaya't hanggang ngayo'y nandito ako at nandiyan ka.