ASO

Ipinanganak ka ng may lubid sa pusod at wala sa leeg,

Nagdurugtong sa buhay,hininga at sa pag pintig,

Ang tinig  mong nakakabulahaw at nakakatulig,

Wag mong ipagkakamali ang  pagiyak sa alulong ng bibig.

Kandungan,duyan at kuna ang pahingahang inilaan,

Hindi sa  kalye,garahe at lalong hindi sa bakuran,

Masarap na kanin at ulam  ang nakahain sa pinggan,

Anot' tila tira tirang ulam ang iyong pinagtyagaan.

Ang tawag sayo ay tao at may dalang karunungan,

Nararapat lang na umasal ng naayon sa pinagmulan,

Pagkat ang aso'y tawagin mang matalino at damitan,

Ay mananatiling "Asal Hayop" magpakailanman.

Ilog Pasig

Humahalik sa lupa ang bibig,nagdurumi at nauuhaw sa tubig,
Nagnanasang ihiyaw ang ibig,ng marali't masakit na tinig;
Lumilikha ng di naaayong pantig ,sumasambulat ang tonong nakakatulig
Lirikong akala mo'y pakabig,ay marapat  na itapon na lamang sa ilog Pasig.


Sa ilog ng pusong maralita,nagtatago ang mabalasik na diwa,
Bukambibig sa kakisigan ng malaong manggagawa,
Anong silbi ng mga kwentong hindi maunawaan ng kapwa,
Patuloy na magsusumiksik ang pagkataong hindi makawala.


Sumasakal at kumikitil sa hininga mo'y lumot,
Duming itinapon at ikinakalat ay nagsisilbing salot,
Sa buhay  mong nagngangalit sa pait at poot,
Hindi maapuhap ang gandang sa iyo'y  bumabalot.

"Mendax"

Humahabi  ang makinang may ngipin,
Nababasa ng likidong asido kung tawagin.
Humuhulas ang pinturang pulang isinalin,
Nagbababaga't lumiliyab ngunit di kayang pigilin.


Lumiko't umikot...supot-supot ang hinakot;
Dala ang patalim ng sigalot at takot.

Sumuko't  lumusot...daan-daan ang isinangkot;

Dala ang pananggalang ng inggit at poot.

Kagalakan ang bitbit ng bayong ng salimuot;

Pinagtagumpayang kwentong kakila-kilabot.

Kamatayan ang papuring sayo'y ibinalot;

Ng haring kung ituring ay palalo at salot.

"Tula kay Mahadera"

Hindi lahat ng nagsisimba,sa altar pumupunta.
Minsan pa nga,nkatapis nalang sya ng tuwalya.
Sa loob ng kumikinang na silid na porselana;
Sumasayaw ka sa saliw ng Imoral na pyesa

Matakot,manginig at mangilabot...
munting impyernong sa lupa mo nililibot.
Nangangamoy,umaalingasaw at naghuhumiyaw...
Daig ang estero sa lansang sayo nangingibabaw.

Buhat sa Hilaga patungong Timog;
Nagpupumiliit maangkin ang talang hinog
Nahulog at nalugmok sa kaawa awang pood;
Pinatay ng makasariling paniniwala at poot.